hardchiu revolution – 未來的革命

七套戲入面最好睇的一套, 亦係唯一本身有諗過睇的一套…
由於要轉場的關係, 少睇了頭15 分鐘
希望沒有錯過精彩的情節罷…
搭的士過去, 一去到旺角百老滙, 10 號院…
即係跑了八層扶手電梯, 仲要跑兩層樓梯…

好, 上到去上氣唔接下氣, 第一幕見到成班人除衫唔知玩乜
大概係宿舍迎新之類罷…, 唔知錯過了幾多呢

這是關於大學校園的電影
看著看著, 有種很想回到校園讀書的感覺
我對知識的渴求, 對事物的好奇仍然存在嗎?

讀書的時候我都非常討厭那填鴨式的教育, 討厭死記爛背
唔知係刻意定本身係咁, 個人變得沒有記性了… 結果成績唔算好好
現在想起來, 其實是有點蝕底, 那本來是沒有矛盾的, 可以兩樣都做
不過話說回來我又唔係好著重那些分數, 夠做想做的事就好了
只係當年剩下的時間全都用了來思考罷… 結果沒做到什麼出來

想當年入大學的時間是有著一份熱誠的, 今天不知道還剩下多少
我有想做的事, 然後在大學獲取相關的知識
在學到相關的知識之後會立刻想想可以怎麼應用
現在知道的多了, 究竟是和我想做的事近了還是遠了?

出來工作之後雖然有繼續學新的知識, 但熱誠就是不斷不斷的減退
因為會覺得所有事都和資源有關, 和錢有關…
靠愚公移山也是移不到很多座大山的…

這套片好睇, 因為佢勾起了我的熱誠
自己是為什麼去吸收知識的? 不是為了錢, 也不是為了份工
心中有著想做的事, 但到今日都未做到, 其實是有點氣餒
但Rancho 話應該追求的是卓越, 而不是成功, 成功會自動找上門
無錯, 這也是我從前的想法, 只係近年忘記了, 擔心是因為自己用錯方法
用心向著想去的方向走就是了, 還有很長的路要走,
未成功只係因為還未做夠

雖然套片講到Rancho 無缺陷似的, 有點假
不過他的思考模式的確有值得學習的地方
那是一種直接的思考方式, 就只是對著問題找答案, 不管任何框框

Aal izz well (All is well)
人心是很脆弱的, 有時要懂得去氹下佢
的確, 要走出框框每每都需要勇氣
船到橋頭自然直, 給點自信, 相信將來的自己可以解決每一個問題
所以最緊要的還是先解決當下的問題罷, 之後的問題將來可以解決到的!
在衝過了這個難關之後, 回想一下, 之前遇到的所謂困局根本不算什麼

Aal izz well, 其實和我的第二誡是同樣的想法
那就是希望

作死不離3 兄弟, 他們都無私地為朋友著想
有著這般的朋友, 無憾

[link]
第一誡 – 無悔
第二誡 – 希望

———————————
Aal izz well

話說之前有次睇四套戲, 其中一套係暗戰2
竊聽風雲大概是暗戰同一系列的電影罷

相比起暗戰, 我覺得暗戰的鬥智成份比較高 (兩套都冇睇過第一集)
竊聽風雲2 基本上都係阿祖照原定計劃由頭行到尾
阿何sir 係得開頭勁勁地, 望一望就知人係邊…
之後雖然都有貢獻, 但係都只係被阿祖利用

上面好似講到好似唔係好緊湊咁, 但其實都有好睇的地方
就係那些講股票買賣的地方
那些造市的過程,
什麼什麼聯手打美國佬,
羅生連續技將$100 炒上幾十倍,
阿祖一日內將隻749 炒上成十倍 (但都冇停牌)
雖然我都唔係好識, 但就是覺得很精彩, 或者係因為平時見唔到罷

其實套戲的重點似乎是股票多於竊聽呢~
講竊聽的話, 我大概只見到一個軍方專用竊聽器, 微型攝影機同老人院用GPS 膠咭
都是用軍方兩個字就帶了過去, 沒有提出現代通信的漏動, 或警方過份的監聽
比較誇張的就是警方唔知點解可以有人辦公室的即時影像…
但那不是建基於通信基建上的竊聽呢, 要裝鏡頭的…
或者勉強說是對面拍過去還可以罷~

有驚喜的一套, 本來以為係笑片, 都係譯名譯得差

朋友結婚, 的確係值得開心的事
但有時想一想自己, 不禁會形成一種對比 (我做了五次兄弟了…)
Annie 在人生的谷底時擔當起最好朋友的伴娘
本來也沒什麼, 為朋友是應該的, 也提起心機準備去攪得好好睇睇
問題係姊妹來自五湖四海, 還有人令自己覺得與朋友的距離遠了

相識多年的朋友, 大家行著不同的路
朋友交到新朋友一點也不出奇, 就只係自己唔習慣罷~
朋友就是朋友, 一起經歴過的不會因為交到個新朋友就會消失
有時反而係驚際遇太唔同, 人變了, 距離真的變遠了罷…
Annie 就係因為感覺到朋友變得太多, 接受唔到自己少了個摯友
在谷底的情緒之下爆發了出來, 瘋癲的舉動令自己與朋友走得更遠

之前是谷底, 有人安慰佢谷底就係最差, 之後就會好
但問題係你唔知道幾時係最差, 一谷還有一谷低
Annie 就是在那谷底的時候走到比想像之中更低的地方

其實所謂谷底或者黑仔, 有時只係自己想得太多, 或者係自己做成的
個警察先生話你知, 有時問題出現係因為自己沒有好好去處理
明知道尾燈有事又唔去修理, 當然會有日撞車啦
那是簡單的道理, 不是黑仔
點解明知道解決方法都唔去做? 那大概就是逃避
因為有著別的事做, 就放任自己唔去正視存在的問題
然後有問題的地方越來越多, 最後通通出事的時候就變成谷底了

Annie 話自己冇朋友, 被阿肥妹大罵
冇錯, 係朋友面前咁講係會激嬲人的… (我試過… sorry…)
我都有時會咁講, 其實那只是一種感覺罷…
我幾時都當大家係朋友, 只係… 我覺得冇朋友罷… (我可能又講錯說話了…)
阿肥妹話怨來做乜, 做乜唔反抗
的確對佢來講, 佢條路更難行, 亦都克服了, 好好的生活著
我知道我條路已經算好好行, 但我真係唔知我要點反抗

我對人唔好嗎?
還是我應該閙人, 叫人對我好一點?

———————————
對我好的人我是心照的
唔好當係自己呀~

個戲名都幾吸引, 但估唔到係一套爛片
本來都知係套笑片, 不過原來係迫你笑那一種

似乎比Contagion 更差.. 寫得更少… (hehe….)

基本上睇完套戲都唔知自己有睇過什麼
結論得一個, 個個boss 都係差的,
無論係邊, 又或者換了幾多個boss…

笑位有好多, 但好多我都笑唔出…

比較悶的一套, 本來仲想睇佢點表揚前線醫護人員,
點知套戲完全係貶低香港…
睇咁多套, 唔好睇就唔寫咁多… (<– 藉口!!)
基本上都係一套末日電影, 描述關於傳染病的末日
講市民會上街搶資源, 醫護人員會走佬
講官商勾結的陰謀論, 講國家之間的不平等關係
只係最後結尾結得太輕鬆, 好似沒什麼障礙就解決了問題

另外一個套戲的重點是網上的言論與病毒的對比
病毒傳得快, 網上的言論也傳得快
有時網上的謠言可能來得更可怕, 因為沒有疫苗, 大家也生不出抗體
不過也不一定只是網上的言論, 有時用電話傳的也很快呢~

———————————
真係要做多點運動, 累積健康!!

一套在試探友情與愛情界線的電影
朋友, 究竟可以有幾近?
愛情, 究竟又可以有幾遠?

這是一個很長很長的故事, 雖然化在電影之中就只107 分鐘
代入去想像, 20 年, 究竟那有幾漫長? 每日的生活又怎麼過?
很痛… 我只能感到痛, 縱使中間會有著快樂, 也不曾會感到開心

這故事像是很誇張很刻意的去成就這段情,
但另一方面, 類似的情況似乎在現實生活都十分普遍,
只係現實中有勇氣去付出, 去對抗命運的人不多

遇著深愛著的人, 真的能夠放低嗎?
天意弄人, 大家各行各路, 也許是有緣無份
難度要對方等嗎? 不可能, 那維持著朋友的關係好了
因為只是朋友, 所以怎樣都好, 沒有呷醋的理由
關心的就只是朋友開心與否
開心就好了, 也不希望朋友會行差踏錯

這很不正常嗎? 其實在我來講, 朋友本來就應該咁…
所以我都幾抵死, 大概沒有人會這樣對我罷…

如果那些是友情的話, Emma 同Dexter 的愛情發生在那裏?
大概不只發生在每年7 月15 的那一天
試想那份情是怎樣維繫的? 沒有頻密的電話通訊或見面, 情不會變淡嗎?

Dexter 每年都很著緊那一天, 事前的期待維繫了那份情
他每有困難第一個想起的是Emma,
其實是潛意識想多一個接觸Emma 的機會, 亦提醒著他自己有幾重視Emma

Emma 亦都時常留意著Dexter 的節目, 就像每天都有見面一樣
從Emma 的衣著看來(尤其是那副眼鏡), 她初頭比較似在掩飾自己美的一面
那習慣代表著一種想法, 似乎在逃避著追求者, 又或者是想找到真心的人
直到後段, 她似乎是放開了, 也許是知道Dexter 已經結婚, 於是終於能夠放低
從這裏看來, 在Emma 心目中, 似乎認定只有和Dexter 一起才會開心一般

Emma 和Dexter 的愛情就發生在這些無形的接觸和無聲的默契之中
直到最後一段, 這些日積月累, 無法疏導的感情, 一下子爆發出來
很艱難的, 終於可以有形的一齊了
那長年累月的儲蓄本來可以確保他們可以好好的相處下去
只係想不到套戲的結局是這樣
雖然在那一幕之前已經估到, 但就是想不到真的是這樣安排

————————————–
好笑好笑, 一個不懂愛情的人講愛情片…