hardchiu revolution – 未來的革命

你睇人好, 人睇你好
真的嗎? 唔知道, 只知道唯有這樣去諗

因為見不到別人不好的一面
因為見不到別人付出了多少
因為大家著重的地方不一樣

我見到身邊的人個個都好似好好
當然間中都有一兩個見到都覺得佢過得唔太好, 但大部份都真係好好
羨慕嗎? 妒忌嗎? 大概沒有, 因為這和我無關

你睇我好嗎? 我一點也不覺得
也許我被認為好的地方才是我覺得最痛的地方
用生命來換取自己不需要的物質, 太差
識我的都會知道, 我需要的物質確實不多, 很少很少已經足夠
那我在做什麼!? 並沒有向著心中的方向走, 那是我最痛心的
你睇我好? 無錯, 因為你不是我朋友

我覺得大家生活都好似好好
亦都無錯… 因為我知道大家的不多, 也許沒有人願意被我聽到
我大概是個很可怕的人, 盡全力的付出了卻當然的得不到回應
明明我見其他人的關係都不一樣, 明明我見別人比我做得更差
也許那是我看不見別人背後更大的付出罷…

的確在必要的時候, 我也曾經做過冷落人的事
但其他時候我都絕不容許有任何人被冷落
縱使有時我也怕麻煩, 沒有主動的去負起責任
我這個下場是報應嗎? 大概是抵死, 該死罷…

我知道我做爛市, 但我所做的是我唯一認同的事
我也有軟弱的時候, 不過我天生就是不懂得妥協的
沒有錯, 改什麼?

可以有好事發生嗎? 那已經是一件很陌生的事了…
我做錯了什麼? 我只係想極都想不通

我錯嗎? 我不知道, 也沒人話我知
所以還有人指出你錯處的話, 請好好珍惜

這條路難行, 最近也開始佩服自己能夠堅持下去
我相信自己的決定, 也相信著好事始終會發生
至於其他人有幾好, 那是另一條路, 與我無關

忽然想出一條重要的法則
就係嬲人之前先要了解一下人係唔係正在嬲自己

因為這是你變得唔清醒前的最後一刻
因為嬲不是能用來互相抵消的籌碼, 相互的嬲是很難消除的
因為嬲一個嬲自己的人是很無謂的
因為一個正在嬲的人所作的行為是不尋常的, 是有特別意義的
因為忽略別人的嬲會令自己看不清全局, 找不到最直接解決問題的方法
因為站在對方的立場去想, 是解決問題的第一步

講就容易…
但假若真的重視一段關係的話, 就有了足夠的條件做得到
如是者應該可以防止很多誤會發生

我個人算係好理性嗎?
我唔知道, 我只知道我還有很多很多問題未解決…
也許總括來講也不能說是很多,
一個人會面對的問題大概都係可以總括成幾個問題…

很多年了, 我面對同樣的問題都好多年了
就是找不到解決的方法, 也許知道改善方法也執行不到
最近人又變得心神恍惚了, 可能係想著的太多

其實又有邊個人係沒有問題需要去解決呢~?
只係要解決的問題不同罷…
將當下的問題巨大化, 當做自己才面對著, 這是很感性的做法

對我來講, 我只係諗爆頭都不諗到解決的方法
也許我太蠢, 又或許有些問題一個人是解決不了的…

如此想來, 我理性嗎? 不, 我不夠理性
說實在, 我也確實不斷的叫自己不要太理性…
因為絕對的理性只會困死自己, 人是需要有錯誤的, 要能夠容許有錯誤

雖然問題這麼多年都解決不了, 但從另一個角度看, 其實還頗值得慶幸的
就是我沒有製造更多問題出來, 沒有行差踏錯, 一個人還能撐過去, 不簡單罷~
不過又從另一角度看, 這並不值得慶幸, 反而是問題所在
這麼多年來我都是在這矛盾中折磨著自己
我只知道只要我不放棄去找問題的答案, 我終會找得到!

沒有大膽的嘗試, 好多時唔係因為想著自己, 而係唔想害其他人
或者都係叫為件事, 因為我對自己望到的將來好有信心
我幾乎覺得自己可以肯定當下的一個決定對件事來講係好定唔好
只係信我的人不多

一個人我行得到, 但這對件事不好的, 而且我其實係想大家都好

會想到解決辦法嗎? 還是我要想少一點, 控制少一點?
見係自己地方又冇乜人睇先講, 我都真係冇乜點醉過 (<–只係飲得少…)
就算飲, 我都控制得自己太利害了…

框, 不單是一個局限, 而是一條界

很多人以為走到框的另一邊就叫突破了框框
但其實他們只是走到框框的另一邊
他們從不能走到框外邊變到不能走到框裏邊

真正的突破框框是要去忘記這一條界
隨波逐流很不酷嗎? 其實被世俗眼光所影響一樣不酷
縱使是反方向的走, 這都是被影響, 一樣是不能隨自己意志行動

如果明白我講什麼的話, 請立刻將之忘記, 因為我並不是在劃第二個框
忘記罷~, 隨自己的意思行動就好了

聆聽自己的內心, 在沒有界的地方任意而行
人生苦短, 應該走到自己真正喜歡的地方, 我心底裏是這般想的

話說最近轉手提網絡供應商
因為要轉電話了, 舊那部的相實在太不濟
而且實在想試下那新功能究竟去到什麼地步

本來都以為冇咁快有corp plan
點知臨開賣前一日就有了, 不過就要即日三點前決定
係我印象中,我係冇約係身的, 直到第二日簽約之後懷疑自己

兩年前係上一份約完之後, 打電話簽了一份續約plan
記憶中好似係簽15 個月約, 每月回贈$60, 完約後自動續
當時計過下, 毁約都唔係好蝕, 好快就抵過唔簽
最緊要係要轉貴plan 的話可以隨時轉, 似乎唔需要毁約啦
於是係我心目中, 我係冇約係身的

想不到一個急忙的決定之下我立刻做錯決定
其實都未至於好錯, 但事先冇預計清楚就覺得自己好錯…
所以呢~ 我做決定真係要好長時間…
今次算好彩, 係從前的自己將愚蠢控制好了

今日打去問, 份約三月先到期, 毁約費$600
本來公司都有Smartone plan 㨂的, 但只係免行政費
如果當時有將毁約的因素計算在內, 我大概會有傾向揀Smartone
計一計現在的CSL plan 是慳了24 個月$3x 的VAS, 還是比較便宜的
但就等於蝕了16 個月的服務, 不過係唔會用的服務
如果假設真係唔會用那些服務, 就叫慳了8 個月的VAS 罷..

也許知道的話我會唔知點選擇都未定
還不錯罷, 人有時要錯下先會走得出local maxima
有時有唔經大腦的決定也不一定很差
$600, 豪一豪, 當去先達買機, 提早有得試
都… 勉強豪得起的…

不過話說回來, 新功能試過了
十分之慶幸那做得出奇地差
試過之後心情好了很多

———————————————————
也許我要少一點計算, 才有機會走到自己想像以外的地方

生日當天去了海洋公園,
一直都想去試下享受這個屬於香港人的優惠
難得係星期日, 假都唔需要請, 真係零成本
其實今年可以帶一個人半價入場, 但沒有叫人去了,
沒有想叫的人, 亦不想引起任何誤會
有想過益街坊, 不過都係遊客多, 最後都係算

本來就只係想入去遊蕩, 想一想自己的下一步
但拎著相機, 行到未去過的場館就停不了的在影, 什麼都沒想過

一個人, 還以為可以去些平時沒有去的地方
可能太遲去, 去到都差唔多一點
都係去唔到坐氦氣球, 上觀光塔, 睇雀鳥劇場
摩天輪都很多年沒坐過了, 大概只係細細個的時候坐過
機動遊戲方面都仲未玩過韆鞦, 個翻天覆地就直頭望都未望到
新的熱帶雨林主題都還未去呢~

去了新的海洋館, 叫海洋奇觀, 向上望果然係一流!
然後今次居然企定定睇雜技人的表演, 平時唔會的
行下行下見到大熊貓之旅, 原來係未去過, 之前都只係見過安安佳佳
一個人坐了一架纜車, 日頭一次入黑又一次
之後見就夠鐘海洋劇場, 就衝了去中華鱘館行個圈
再去就剛剛開始, 用生日優惠買了個炸熱狗同橙汁, 都要$39
人又唔帶來, 叫做俾少少生意海洋公園啦~ 都肚餓的

海洋劇場又係很久很久沒有睇過
看著海豚推著人游水的一刻想起自己的童年…
忽然想起自己當時的想法(都可能係現在的想法..)
忽然在想, 當年自己還有人陪呢~…
本來還期待會有殺人鯨出現, 但依稀記得海威小姐已經離開了
結果果然沒有呢~ 剛剛查了一下, 原來已經係97 年的事
其實現在看著海洋劇場會想, 不知道訓練的方法怎樣呢…
不過看著訓練員和動物的交流, 似乎也很友好的罷

睇完後頹頹的只玩了一次過山車, 因為六點就到夜場了
玩不到機動遊戲, 纜車又多人, 就去了水母館兜一圈
已經沒什麼感覺呢~ 因為全部都還在記憶之中, 而且一模一樣
無錯, 水母館開幕大概係我對上一次平日去海洋公園
今次週圍行有時也想起少少從前的片段呢~

走人的時候見到Halloween 的職員
又係那個跣地的鬼, 佢係我面前跣了一下,
我覺得嚇一跳的, 但竟然完全沒有反應, 也許太沒心情了
然後可能佢唔順氣, 趁我唔為意又係我面前跣一下
今次都係覺得突然, 但都係冇反應…
真係唔好意思… 我已經沒有心情俾反應了, 有心情我都想陪你玩…

臨出門剛剛睇到雙龍奇緣, 不錯罷~
有火有水有煙花呢~ 還真的會感覺到熱力的!

睇完搭629 出金鐘, 一個人又冇心情食好的
最後竟然塔丁丁到公司附近食譚仔, 就當生日放縱一下罷
點知食完今日喉嚨頂著的情況好像又差了
前兩日還以為好了一點
真係唔知係前兩日的咖啡, 還是譚仔了…

多謝海洋公園, 真的是一個很有heart 的地方
我從雜技人身上感覺到, 從訓練員身上感覺到, 從跣地鬼身上都感覺到
究竟係點令到班員工咁有heart?
他們大概是全港最知道自己在做什麼, 最落力去做的員工!

多謝你們, 你們的落力演出給了我一點點的動力

————————————————
也許我第一樣要做的是身體健康…