hardchiu revolution – 未來的革命

大概都算係一套末日電影, 是我喜歡的題材
衝衝忙忙的被拉去睇了… 仲要係亂揀的情況下睇的
不太享受這樣的過程, 就是少了一種期待

的確套戲所講的主線都係非常真實, 係現實世界絕對有可能發生
搵藥醫病, 搵動物做測試, 這種事每天都在發生

套戲的佈局唔錯的, 連我平時唔點顧忌, 今次都唔想爆得太多
成套戲的目的都好簡單, 就是想問猩猩變得聰明的話會怎麼樣

人類, 一路以來就是萬物之靈, 小學的時候都是這樣教的
當遇上一樣聰明的異類時, 自然地會有種害怕的感覺
因為突然變得不再獨特了, 突然有種要重新定位的覺悟
也許我們都安逸得太久, 這一刻變成不能再屈機了

戲入面的確很多巧合, 基本上我唔認為劇情會有這樣的發展
因為就算聰明都唔一定有用, 事實上係聰明人都唔一定會有作為
除了本身聰明與否, 還有經驗, 制度, 工具與科技的累積
要經營出勢力, 不是單單聰明和齋諗就可以做到
換句話講, 我當主角唔係猩猩, 係一個聰明小朋友
如果只係教下佢聽說讀寫, 佢又唔睇書, 咁佢有幾勁?

不過再想一想, 誇張的部份可能只是那些過度擬人的場面罷
其實最終佢都只係做了一件簡單, 直接的事
有時係我們和大自然脫節得太久, 忘記了動物可以有幾勁
我們只是畫了一個地盆, 用自己的方式生活罷
如果將一大群普通猩猩放係市區… 可能本身已經唔簡單…

題外話, 戲入面的猩猩似乎大部份都係公的
不過冇專登留意某重要部位, 也沒有留意到, 會唔會係和諧了…?

咁大個仔, 第一次連續四個禮拜去睇醫生
雖然唔係咩大問題, 但從前都未試過咁落力去睇醫生…

我也不清楚自己是什麼狀態了
其實我已經算好落力咁睇著自己 (對我來講…)
究竟係我太投入, 忽略了太多
還是我的底線太過高…?

今次臨走醫生叫我唔好咁緊張…
似乎佢都係幫唔到我, 下個禮拜可能都唔睇了
還是靠自己, 用自己的方法

———————————-
其實仗我一定會打贏,
我唔擔心自己, 我擔心其他事更多

昨天出席了上次講那個行山時出意外的中同的喪禮
也是我第一次出席朋友的喪禮
(注意: 以下所寫的沒怎麼刻意避忌)

今次去寶福山, 和小時候出席的喪禮感覺很不一樣
一去到見到燈火通明, 少了一種沉重的氣氛

簽了個名, 呈上帛金, 入去鞠個躬然後同幾個中同找個位坐低
坐低後有人叫我們幫手摺元寶, 也很久沒有摺過了
從前細個都沒有留意原來朋友都有幫手摺的
我在想, 那些所謂的禮儀也挻有意思的, 起碼大家都可以有點事做
而且也是一份心意罷
一邊摺, 一邊在想, 也許這是最後一份心意了
之後大概也不會遇上那中同的家人, 說實話我也不認得那個是他家人

一邊摺, 一邊四圍望, 望望那些花牌
有幾個義工團體的, 有幾個戶外活動團體的
當然還有不少朋友, 同學, 大學的莊友, 同事
十多年沒有聯絡, 中間聚會的時候也不太清楚原來他也挻活躍的

想一想自己, 究竟這些年來我做過什麼?
也許有人會想像自己的婚禮會怎麼樣
而我大概只能想像自己的喪禮會怎麼樣罷…
稍稍的想了一下, 不敢再想下去, 因為是悲觀的

坐了一會, 入去望了望那中同的遺容
不是第一次了, 也同樣是想著很多很多

出來後再四圍望, 望望出席的朋友的臉孔
出奇地見到大家仍然係有講有笑
回想從前出席的喪禮, 見到不少哭著的臉孔呢…
也許是身份不同, 時段不同罷… 而且大家也還年輕

對我來講, 我儘量都唔想有講有笑
因為縱使笑的是其他事, 也顯得有點不尊重, 不在乎他家人的感受
但原來我們交談的時後就是習慣了面帶笑容
雖然只係簡單的打招呼, 交換近況, 也都不自覺的露出了笑容
我比較小心一點, 有注意一下, 大概不算太差罷

其實要講要笑, 完結後, 步出靈堂後也可以呢~
除了兩三個比較熟的中同在留守, 一眾中同們難得聚首一堂,
我們其他人之後去了大圍的新強記食飯聚一聚

去大圍途中, 其中一個中同的招呼竟然係問我做乜甩咁多頭髮…
聽到後我呆了一呆, 乜原來我睇上來係個甩頭髮的樣子
十多年冇見, 我知道那是真心話, 我自己也沒什麼留意到
還對自己說一路以來都是差不多的

成餐飯我們大概只講了兩句那中同的事
雖然我問仲有邊個會來的時候有人唔知點解在嘴邊講錯了兩個字…
其實如果唔係平時有聯絡開的話, 的確對其他人來講沒什麼改變
甚至潛意識也未改變自己的習慣
對其他人來講, 世界還是依著幾乎一樣的模式在轉

食完飯, 同另一個比較熟的中同返將軍澳
找了另一個住將軍澳的中同去食糖水, 終於試了一次「聰嫂私房甜品」
有人話「山長水遠」走去佢樓下, 所以請食糖水
其實都幾好食, 又有人請, 真好

———————————
活著多好

有朋友請睇戲, 仲同另一個好耐冇一齊睇戲的朋友去睇
難得的簡單地聚一聚, 感覺幾舒服

最近太多戲睇, 本身以為落畫前都唔會去睇
成個月, 我都以為已經落畫, 估唔到仲有人請我睇

望著海報, 見到Jim Carrey 同一個純攪笑的譯名
還以為只是一套胡鬧的喜劇
誰不知套戲的內容都幾好睇, 幾適合我睇

Mr. Popper 大概是一個很極端的人
要狠要拼命絕對做得到, 也許他大半生都是這樣
故事主要描述的是他亦可以為感情狠狠地付出, 去拼命
甚至優先於自己的事業

無錯, 認為是對的就拼命去做, 對我來講是最簡單的
那也許是一種要求, 因為很難去妥協, 所以要更加專注, 拼命去完成

Mr. Popper 是一個說客
他的專長大概是提供一大堆建議去說服人
溝通有時是很難的, 也許純利益關係有時來得更簡單

就像他的秘書小姐Pippi, 大概收很高人工罷
有求必應, 任何任務都全力以赴, 的確是很簡單, 很易處理的關係

溝通是雙向的, 所以即使你付出全力, 也可以完全沒有回應
那的確很累人, 根本摸不透裏頭有什麼法則

故事透過Popper 一家同那些企鵝話你知
聆聽在溝通的過程中其實佔很重要的部份
試想一下怎麼會全力以赴卻沒有回應? 那大概就是雙方都沒有在聆聽
沒有人在聆聽, 當然就沒有付出的力被接收, 那也不是一個人的錯
聆聽也要是用心的, 因為真正的聽到, 才會嘗試去改變自己
始終要有一方面先去聆聽, 改變自己, 去接上溝通的線路

人與人之間的相遇有時是講緣份的, 有時是天生夾不來
例如大家有著互相違背的原則, 互相抵觸的低線
所以即使是有聆聽, 有改變, 也不必然得到預期的結果
就像那隻企鵝蛋一樣, 是不能強求的, 唯有下次做得更好
但人是會從經驗中汲取教訓的,
付出了全力卻仍然失敗, 下次怎能夠繼續?

做戲的話, 還可以短時間內有個完滿結局, 暖暖的
現實世界的話, 也唯有堅持, 唯有容許自己繼續去錯
因為那是作為一個人所應該重視的事
亦是人和機器的分別

———————–
會有完滿結局的一天

剛收到中同電話, 這幾年大概一年都有見一次的
本來以為都係約食飯罷, 點知約食飯之餘收到一個消息

原來前排行新娘潭意外身亡的是我一個中同
畢業後都幾乎沒有見過他, 就幾年前見過他一次罷
想不到那是最後的一次

意外, 就是意想不到的
完全沒有想到會發生, 沒有想過會這樣完結
和我同年紀也在同一行工作, 雖然唔太熟,
但想他必定還有很多很多事想做, 一個意外就完結了

我不敢想像這發生在我的身上
我只知道我要更加更加小心, 就算一個人都要好好睇著自己
其實同其他朋友行山, 他們都很勇, 有時更不單是普通的勇
有時我會驚真係冇得回頭, 所以會做醜人叫停大家…
叫唔停, 也只好陪他們走, 我只知道唔可以掉低人
出事都好, 多個人起碼都有人幫

我唔係想抽水, 唔係想話佢做錯決定
睇一睇新聞條片, 我叫唔停人的話, 都會覺得係可以一行的
你朋友幾強都好, 被掉低了就只剩下一個人
不過意外就是意外, 我又不在現場, 也不便講得太多

下星期六是那朋友的喪禮
想不到這個年紀就有第一次, 只希望很久很久後才有另一次罷…

[Link]
運動精英攀瀑布失足溺斃

——————————–
大家要好好保重
好好咁睇著自己
不然便去找個能睇著自己的人