hardchiu revolution - 未來的革命

近來收廣告收得越來越嚴重

於是諗,
點解我俾電話費, 但係通話分鐘用來聽廣告多過我自己講電話!?!?
點解聽廣告仲要我俾錢!?!?
點解嫌廣告煩, 我仲要帶部機係身!?!?

其實我帶部機係身, 用來定時聽廣告, 係咪應該我收錢呢?
計一計, 其實又有幾多人係交電話費主要用來聽廣告呢?
如果轉一轉模式… 出部廣告機,
送你100mins, 但屈你聽廣告, 又會唔會合理好多?

haha.. 不過就係咁反智都大把人受囉…
幾時有日會有以下對話?

A: 先生, 有冇需要豐胸呀?
B: 冇需要
A: 點解冇需要呢? 好抵架喎!
B: 冇需要…
B: bye bye……….

A: 先生, 我係XX 呀, 記唔記得我呢~
B: 唔記得
A: 上次同你做個個問卷調查, 你話冇需要豐胸架呢~
B: 唔記得…
A: 我地公司為報答你幫我地做個調查, 會送你一個月免費豐胸療程
B: 冇需要
A: 點解冇需要呢? 好抵架喎!
B: 冇需要…
A: 唔使你出錢, 試完冇效先再冇需要啦~
B: ……….
A: 先生, 係咪好吸引呢~, 唔使考慮啦~, 不如同你做返個登記先!
B: bye bye………

———————-
廣告就冇得收少d…

三點幾了… 唔係未訓, 係再彈起身

突然間覺得自己好精神… 同好肚餓
雖然今朝早餐飲咖啡, 但冇咁見效罷….
又會真係訓唔著…

其實我一向都到必要時先會飲咖啡, 因為覺得會更加有效
不過唔知點解近排冇咁忍口…

都十幾個鐘… 我都唔知關乜事了
係我太肚餓? 係杯咖啡? 訓得太多? 定我太多事諗?

訓訓下諗, 不如彈返起身, 起碼冇咁浪費時間..
之後一起身, 就開餐:
1 包仔薯條 + 1 塊朱古力夾心曲奇 + 6 件燒肉
乜事乜事!?!? 本來仲想食個杯麵.. 不過都係唔好太過份…

話說最近訓唔著頭腦都好清醒, 想通了唔少事
不過今次得少少, 因為唔想太遲訓得著…

好.. 應該訓得著了
Retry now~

———————-
要記得咖啡唔可以亂飲…

覺得上次睇戲好似已經是很遠的事了, 但原來都只係一個月
也很久沒有執到寶, 就是睇了少人講但好好睇的電影!!
其實近一個月都有戲想睇, 不過唔知點解又唔想去睇咁

先講講睇完的感覺
到最後幾幕, 真係睇到笑..
唔係攪笑的笑, 可能… 係傻笑罷

我在想, 有趣有趣, 怎麼看不懂?
老實講, 最後幾幕交代的結局我攪不清
不過想深一層, 或者其實係淺一層, 就覺得好有趣

套戲係講夢想, 但係其實講現實的更多
畫面好虛幻, 但表達的卻很真, 很直接

也許我們有夢想, 也許沒有, 未找到想到的地方
不過同樣的, 有很多誘惑出現在眼前
有時根本分不到那是誘惑還是夢想

人就是無時無刻的在作出抉擇
要達成夢想必然是辛苦的, 困難的
但在誘惑面前又能否堅持呢…
也許夢想無分貴賤, 只要不墮落就是了
就算付出了很多努力, 也不一定就很崇高

天使與魔鬼, 不斷的鬥, 不斷的對賭
不斷的玩弄人心
贏了不等如贏, 輸也不等如輸
原來勝負其實都好難定分界

一個人的智慧有限, 也總有糊塗的時刻
人生本來就複雜,
就算Dr Parnassus 成千歲, 都唔代表乜都識解決
但原來有時人生也很簡單
身邊有提醒自己的人就好了
只係有時我們也看不清身邊的是什麼人罷…

(原來套戲製作過程都幾多災多難,
不過最終都完成了, 而且變得更有味道)
——————
走進Imaginarium 的話, 會見到什麼?
會懂得選擇嘛…
也許.. 現在已置身其中..

最近覺得自己冇乜生氣
對好多事失去興趣, 又冇乜心, 冇乜力去做些什麼出來

同一年或之前的自己相比.. 差!!
真的很差… 人俗了很多
那個全情投入的我呢?
那個對未來充滿憧憬的我呢?

這個不是我, 只是放任了自己一年罷!!
廿幾年唔休息下係會癲的…
唔係心境老, 我仲未想老!!

我仲後生!!!
乜都唔驚!!! 最驚跟著老人家行!!!
咁後生就對現實低頭… 同就死冇乜分別!!!

向著想去的地方行就是了
時間多的是, 走多幾個圈都仲得, 驚乜走錯路!!

———————–
Unread

有張free ticket, 指定係睇Sherlock Holmes 的
於是抽了點時間用了

本身冇睇過小說, 基本上只知道Sherlock 係個偵探罷..
冇諗過原來佢識得打… 仲要原來Watson 係個醫生都好打得…
都唔知係真唔係..

雖然作為賣推理的電影, 也真的太不夠細緻…
講科學的都不夠科學…..
故事一般罷.. 不過拍得不錯
起碼在音樂加鏡頭下, 我有一種神準的感覺, 同預知的快感

的確, 我都認為打都係講部署的, 都要用腦的
不過除了計算之外, 其實仲要手眼協調…
如果話佢計算同實行有點出入, 我會覺得更有說服力

其實近年賣推理同賣宗教的作品都不少
套戲可以話冇乜驚喜
不過睇著Sherlock 超強的觀察力同神準的推測
都幾賞心悅目

———————-
如果我戴著眼鏡,
唔知可以去到咩程度呢.. hoho

最近在想, 點解我好少覺得好味道!?
我會講都好食, 幾好, 還可以, 但就是很少覺得好味道, 好好食

好好食!!
細個的時候街邊婆婆同伯伯的車仔麵好好食!!!
真係好好食… 到今日都冇食過一碗更好食的車仔麵!!!
(有時夜晚返屋企, 係樓下見到婆婆洗豬腸的)

好味道!!
前兩日放工係屋企食的福麵好味道!!
因為從前如果成家人淋完雨, 返到屋企都會食福麵
(雖然唔記得點解會淋雨……)

原來食物的味道有時不在於食物本身
食回憶, 食心情, 食感覺

成日一個人食飯的我很明白…
一個人去食飯係唔會覺得好味的…
所以頹食就好了…

如果唔能夠打開個心去品嚐…
再好食的食物都係多餘的…

能夠留在腦海中的味道..
不簡單

———————–
最近飲多了烏龍茶